ಈಗ ‘ಸಾಲದ ಸಂಘ’ದಿಂದ ‘ರೈತರ ಆರ್ಥಿಕ ಕೇಂದ್ರ’ದತ್ತ ಕರ್ನಾಟಕದ ಸಹಕಾರಿ ಚಳವಳಿಗೆ 122 ವರ್ಷಗಳ ಸುದೀರ್ಘ ಇತಿಹಾಸವಿದೆ. 1904ರಲ್ಲಿ ಭಾರತದಲ್ಲಿ ಸಹಕಾರಿ ಪತ್ತಿನ ಸಂಘಗಳ ಕಾಯ್ದೆ ಜಾರಿಗೆ ಬಂದಿದ್ದು, 1905ರಲ್ಲಿ ಗದಗ ಜಿಲ್ಲೆಯ ಕಣಗಿನಹಾಳದಲ್ಲಿ ಸಿದ್ದನಗೌಡ ಸಣ್ಣರಾಮನಗೌಡ ಪಾಟೀಲರ* ನೇತೃತ್ವದಲ್ಲಿ ದೇಶದ ಮೊದಲ ಸಹಕಾರಿ ಸಂಘ ನೋಂದಣಿಯಾಗಿದ್ದು ಕರ್ನಾಟಕದ ಪಾಲಿಗೆ ಹೆಮ್ಮೆಯ ಸಂಗತಿ. ಅಲ್ಲಿಂದ ಆರಂಭವಾದ ಪಯಣ ಇಂದು ಗ್ರಾಮದಿಂದ ರಾಜ್ಯದವರೆಗೆ ವಿಸ್ತರಿಸಿರುವ ಬಲಿಷ್ಠ ಸಹಕಾರಿ ವ್ಯವಸ್ಥೆಯಾಗಿ ಬೆಳೆದಿದೆ.
ಗ್ರಾಮದಿಂದ ರಾಜ್ಯದವರೆಗೆ ಮೂರು ಹಂತದ ವ್ಯವಸ್ಥೆ
ಕರ್ನಾಟಕದ ಕೃಷಿ ಪತ್ತಿನ ಸಹಕಾರದ ಮೂಲ ಶಕ್ತಿ ಪ್ರಾಥಮಿಕ ಕೃಷಿ ಪತ್ತಿನ ಸಹಕಾರಿ ಸಂಘ — PACS. ರೈತನ ಮನೆ ಬಾಗಿಲಿನಲ್ಲೇ ಇರುವ ಈ ಸಂಘಗಳು ಬೆಳೆಸಾಲ, ಕೃಷಿ ಸಾಲ, ರಸಗೊಬ್ಬರ, ಬೀಜ, ಕೃಷಿ ಪರಿಕರಗಳು ಸೇರಿದಂತೆ ಗ್ರಾಮೀಣ ಆರ್ಥಿಕತೆಯ ಪ್ರಮುಖ ಕೇಂದ್ರಗಳಾಗಿವೆ.
PACSಗಳ ಮೇಲಿನ ಹಂತದಲ್ಲಿ ಜಿಲ್ಲಾ ಕೇಂದ್ರ ಸಹಕಾರಿ ಬ್ಯಾಂಕ್ — DCCB, ರಾಜ್ಯಮಟ್ಟದಲ್ಲಿ ಕರ್ನಾಟಕ ರಾಜ್ಯ ಸಹಕಾರಿ ಅಪೆಕ್ಸ್ ಬ್ಯಾಂಕ್ ಕಾರ್ಯನಿರ್ವಹಿಸುತ್ತಿವೆ.
ಕರ್ನಾಟಕದಲ್ಲಿ ಪ್ರಸ್ತುತ 5,658 PACSಗಳು ಮತ್ತು 21 DCCBಗಳು 818 ಶಾಖೆಗಳೊಂದಿಗೆ ಕಾರ್ಯನಿರ್ವಹಿಸುತ್ತಿವೆ ಎಂದು ರಾಜ್ಯ ಸಹಕಾರ ಇಲಾಖೆಯ ಅಧಿಕೃತ ಮಾಹಿತಿ ತಿಳಿಸುತ್ತದೆ.
ಇದು ಕೇವಲ ಬ್ಯಾಂಕಿಂಗ್ ವ್ಯವಸ್ಥೆಯಲ್ಲ. ರೈತ, ಗ್ರಾಮ, ಕೃಷಿ ಉತ್ಪಾದನೆ ಮತ್ತು ಗ್ರಾಮೀಣ ಆರ್ಥಿಕತೆಯನ್ನು ಪರಸ್ಪರ ಜೋಡಿಸುವ ಸಹಕಾರಿ ಆರ್ಥಿಕ ಸರಪಳಿಯಾಗಿದೆ.
122 ವರ್ಷಗಳಲ್ಲಿ ಬದಲಾಗಿದೆ ಸಹಕಾರದ ಸ್ವರೂಪ.
ಆರಂಭದಲ್ಲಿ ಸಹಕಾರಿ ಸಂಘಗಳ ಮುಖ್ಯ ಉದ್ದೇಶ ರೈತರನ್ನು ಲೇವಾದೇವಿದಾರರ ಶೋಷಣೆಯಿಂದ ರಕ್ಷಿಸಿ ಕಡಿಮೆ ಬಡ್ಡಿಯಲ್ಲಿ ಸಾಲ ಒದಗಿಸುವುದಾಗಿತ್ತು. ನಂತರ ಬೆಳೆಸಾಲ, ಮಧ್ಯಮಾವಧಿ ಸಾಲ, ಕೃಷಿ ಉತ್ಪನ್ನಗಳ ಖರೀದಿ, ಗೊಬ್ಬರ ಮತ್ತು ಬೀಜ ವಿತರಣೆ ಮುಂತಾದ ಚಟುವಟಿಕೆಗಳು ವಿಸ್ತರಿಸಿದವು.
ಕಾಲಕ್ರಮೇಣ DCCBಗಳು ಗ್ರಾಮೀಣ ಬ್ಯಾಂಕಿಂಗ್ ವ್ಯವಸ್ಥೆಯ ಬೆನ್ನೆಲುಬಾದವು. ರಾಜ್ಯಮಟ್ಟದಲ್ಲಿ ಅಪೆಕ್ಸ್ ಬ್ಯಾಂಕ್ ಹಣಕಾಸು ಸಮನ್ವಯದ ಪ್ರಮುಖ ಸಂಸ್ಥೆಯಾಯಿತು.
1915ರಲ್ಲಿ ಸ್ಥಾಪನೆಯಾದ ಮೈಸೂರು ಪ್ರಾಂತೀಯ ಸಹಕಾರಿ ಬ್ಯಾಂಕ್ ನಂತರದ ಬೆಳವಣಿಗೆಯಲ್ಲಿ ರಾಜ್ಯದ ಅಪೆಕ್ಸ್ ಸಹಕಾರಿ ಬ್ಯಾಂಕಿನ ಪ್ರಮುಖ ಪೂರ್ವರೂಪವಾಯಿತು.
ಆದರೆ ಕಾಲ ಬದಲಾಗಿದೆ. ರೈತನ ಅಗತ್ಯವೂ ಬದಲಾಗಿದೆ. ಆದ್ದರಿಂದ ಹಳೆಯ ಮಾದರಿಯ ‘ಸಾಲ ನೀಡುವ ಸಂಘ’ ಮಾತ್ರ ಸಾಕಾಗುವುದಿಲ್ಲ.
ಕಳೆದ ಐದು ವರ್ಷ: ಸಹಕಾರಕ್ಕೆ ಹೊಸ ತಿರುವು
2021ರಲ್ಲಿ ಕೇಂದ್ರದಲ್ಲಿ ಪ್ರತ್ಯೇಕ ಸಹಕಾರ ಸಚಿವಾಲಯ ಸ್ಥಾಪನೆಯಾದದ್ದು ಸಹಕಾರಿ ಚಳವಳಿಯ ಇತ್ತೀಚಿನ ಇತಿಹಾಸದಲ್ಲಿ ಮಹತ್ವದ ತಿರುವು. ನಂತರ PACSಗಳನ್ನು ಬಲಪಡಿಸುವುದು, ಗಣಕೀಕರಣ, ಮಾದರಿ ಉಪನಿಯಮಗಳು ಮತ್ತು ಬಹುಉದ್ದೇಶಿತ PACSಗಳ ಮೂಲಕ ಗ್ರಾಮೀಣ ಸಹಕಾರವನ್ನು ಹೊಸ ಆರ್ಥಿಕ ಚಟುವಟಿಕೆಗಳೊಂದಿಗೆ ಜೋಡಿಸುವ ಪ್ರಯತ್ನ ವೇಗ ಪಡೆದುಕೊಂಡಿದೆ.
PACSಗಳಿಗೆ 25ಕ್ಕೂ ಹೆಚ್ಚು ರೀತಿಯ ಚಟುವಟಿಕೆಗಳನ್ನು ಕೈಗೊಳ್ಳಲು ಮಾದರಿ ಉಪನಿಯಮಗಳ ಮೂಲಕ ಅವಕಾಶ ಕಲ್ಪಿಸಲಾಗಿದೆ. ಹೈನುಗಾರಿಕೆ, ಮೀನುಗಾರಿಕೆ, ಆಹಾರ ಧಾನ್ಯ ಸಂಗ್ರಹಣೆ, LPG/CNG/ಪೆಟ್ರೋಲ್ ವಿತರಣೆ, Common Service Centre, ನ್ಯಾಯಬೆಲೆ ಅಂಗಡಿ ಮುಂತಾದ ಕ್ಷೇತ್ರಗಳಿಗೂ ವಿಸ್ತರಿಸುವ ಅವಕಾಶ ದೊರೆತಿದೆ.
ಇದಕ್ಕಿಂತ ಮಹತ್ವದ ಬೆಳವಣಿಗೆಯೆಂದರೆ PACSಗಳ ಗಣಕೀಕರಣ. ಕಾಗದದ ಕಡತಗಳಿಂದ ಡಿಜಿಟಲ್ ವ್ಯವಸ್ಥೆಯತ್ತ ಸಾಗುವುದು ಪಾರದರ್ಶಕತೆ, ಲೆಕ್ಕಪತ್ರದ ನಿಖರತೆ ಮತ್ತು ರೈತರಿಗೆ ವೇಗವಾದ ಸೇವೆಗೆ ದಾರಿ ಮಾಡಿಕೊಡುತ್ತಿದೆ. 2026ರೊಳಗೆ PACSಗಳ ಡಿಜಿಟಲೀಕರಣವನ್ನು ಪೂರ್ಣಗೊಳಿಸುವ ಗುರಿಯೂ ದೇಶದಾದ್ಯಂತ ಮುಂದುವರಿದಿದೆ.
ರಾಷ್ಟ್ರೀಯ ಸಹಕಾರಿ ನೀತಿ 2025: ಹೊಸ ಅವಕಾಶಗಳ ಬಾಗಿಲು
2025ರ ಜುಲೈ 24ರಂದು ಪ್ರಕಟವಾದ ರಾಷ್ಟ್ರೀಯ ಸಹಕಾರಿ ನೀತಿ 2025 ಸಹಕಾರಿ ಕ್ಷೇತ್ರವನ್ನು ಹೊಸ ಹಂತಕ್ಕೆ ಕೊಂಡೊಯ್ಯುವ ದೀರ್ಘಾವಧಿಯ ಚೌಕಟ್ಟನ್ನು ನೀಡಿದೆ. ‘ ಸಹಕಾರದಿಂದ ಸಮೃದ್ಧಿ’ ಎಂಬ ದೃಷ್ಟಿಕೋನದಡಿ ಸಹಕಾರಿಗಳನ್ನು ಆರ್ಥಿಕವಾಗಿ ಬಲಿಷ್ಠ, ಪಾರದರ್ಶಕ, ತಂತ್ರಜ್ಞಾನಾಧಾರಿತ ಮತ್ತು ಜನಪರ ಸಂಸ್ಥೆಗಳನ್ನಾಗಿ ರೂಪಿಸುವ ಗುರಿ ಹೊಂದಿದೆ.
ಮುಂದಿನ ಐದು ವರ್ಷಗಳಲ್ಲಿ ದೇಶದ ವಿವಿಧ ಭಾಗಗಳಲ್ಲಿ ಹೊಸ ಬಹುಉದ್ದೇಶಿತ PACSಗಳನ್ನು ಸ್ಥಾಪಿಸುವುದು ಮತ್ತು ಕೇಂದ್ರದ ವಿವಿಧ ಯೋಜನೆಗಳನ್ನು ಗ್ರಾಮಮಟ್ಟದ ಸಹಕಾರಿ ಸಂಸ್ಥೆಗಳ ಮೂಲಕ ತಲುಪಿಸುವ ಪ್ರಯತ್ನವೂ ನಡೆಯುತ್ತಿದೆ.
ಆದರೆ ಕರ್ನಾಟಕದ ಮುಂದೆ ಕೆಲವು ಕಠಿಣ ಪ್ರಶ್ನೆಗಳಿವೆ
ಕೃಷಿ ಪತ್ತಿನ ಸಹಕಾರಿ ಸಂಘಗಳ ಸಂಖ್ಯೆ ದೊಡ್ಡದಿರುವುದೇ ಅವುಗಳ ಯಶಸ್ಸಿನ ಮಾನದಂಡವಲ್ಲ. ಎಷ್ಟು ಸಂಘಗಳು ಆರ್ಥಿಕವಾಗಿ ಸ್ವಾವಲಂಬಿ? ಎಷ್ಟು ಸಂಘಗಳು ವೃತ್ತಿಪರವಾಗಿ ನಿರ್ವಹಿಸಲ್ಪಡುತ್ತಿವೆ? ಎಷ್ಟು ಸಂಘಗಳು ಯುವ ರೈತರನ್ನು ಆಕರ್ಷಿಸುತ್ತಿವೆ ? ಎಂಬ ಪ್ರಶ್ನೆಗಳಿಗೆ ಉತ್ತರ ಹುಡುಕಬೇಕಾಗಿದೆ.
ಕೆಲವು PACSಗಳು ಬಂಡವಾಳದ ಕೊರತೆ, ಕಡಿಮೆ ಲಾಭಾಂಶ, ಸಾಲ ವಸೂಲಾತಿ, ಸಿಬ್ಬಂದಿ ವೆಚ್ಚ, ತಂತ್ರಜ್ಞಾನ ಮತ್ತು ನಿರ್ವಹಣಾ ಸಾಮರ್ಥ್ಯದ ಸಮಸ್ಯೆಗಳನ್ನು ಎದುರಿಸುತ್ತಿವೆ. ಇತ್ತೀಚಿನ ವರದಿಗಳಲ್ಲಿಯೂ ಕರ್ನಾಟಕದ ಕೆಲವು ಕೃಷಿ ಪತ್ತಿನ ಸಹಕಾರಿ ಸಂಘಗಳ ಹಣಕಾಸಿನ ಒತ್ತಡದ ಬಗ್ಗೆ ಚರ್ಚೆ ನಡೆದಿದೆ.
ಇನ್ನೊಂದೆಡೆ, ಸಹಕಾರಿ ಸಂಸ್ಥೆಗಳ ಕಾನೂನು ಮತ್ತು ಆಡಳಿತ ವ್ಯವಸ್ಥೆಯನ್ನೂ ಇಂದಿನ ಡಿಜಿಟಲ್ ಮತ್ತು ಆರ್ಥಿಕ ಪರಿಸರಕ್ಕೆ ಹೊಂದುವಂತೆ ಸರಳೀಕರಿಸುವ ಅಗತ್ಯವಿದೆ ಎಂಬ ಅಭಿಪ್ರಾಯಗಳು ವ್ಯಕ್ತವಾಗಿವೆ.
ನನ್ನ 20ಕ್ಕೂ ಹೆಚ್ಚು ಜಿಲ್ಲೆಗಳ ಪ್ರವಾಸ ಕಲಿಸಿದ ಪಾಠ
ಸಹಕಾರ ಭಾರತಿ ರಾಜ್ಯ ಪ್ರಧಾನ ಕಾರ್ಯದರ್ಶಿಯಾಗಿ ಜವಾಬ್ದಾರಿ ವಹಿಸಿಕೊಂಡ ನಂತರ ಕರ್ನಾಟಕದ 20ಕ್ಕೂ ಹೆಚ್ಚು ಜಿಲ್ಲೆಗಳಲ್ಲಿ ಪ್ರವಾಸ ಮಾಡುವ ಅವಕಾಶ ನನಗೆ ದೊರಕಿದೆ.
ವಿವಿಧ ಕೃಷಿ ಪತ್ತಿನ ಸಹಕಾರಿ ಸಂಘಗಳಿಗೆ ಭೇಟಿ ನೀಡಿ ಅಧ್ಯಕ್ಷರು, ನಿರ್ದೇಶಕರು, ಸಿಬ್ಬಂದಿ ಮತ್ತು ರೈತರೊಂದಿಗೆ ನೇರವಾಗಿ ಸಂವಾದ ನಡೆಸಿದ್ದೇನೆ.
ಈ ಪ್ರವಾಸಗಳಲ್ಲಿ ನನಗೆ ಸ್ಪಷ್ಟವಾದ ಒಂದು ಸಂಗತಿ ಎಂದರೆ — ಗ್ರಾಮೀಣ ರೈತನಿಗೆ ಸಹಕಾರಿ ಸಂಘದ ಮೇಲಿನ ನಂಬಿಕೆ ಇನ್ನೂ ಗಟ್ಟಿಯಾಗಿದೆ.
ಆದರೆ ರೈತ ಈಗ ಕೇವಲ ಬೆಳೆಸಾಲ ಕೇಳುತ್ತಿಲ್ಲ. ಉತ್ತಮ ಬೀಜ ಬೇಕು, ಮಾರುಕಟ್ಟೆ ಬೇಕು, ಸಂಗ್ರಹಣಾ ವ್ಯವಸ್ಥೆ ಬೇಕು, ಕೃಷಿ ಯಂತ್ರೋಪಕರಣ ಬೇಕು, ಬೆಳೆ ವಿಮೆ ಬೇಕು, ಡಿಜಿಟಲ್ ಸೇವೆ ಬೇಕು, ಉತ್ಪನ್ನಕ್ಕೆ ಉತ್ತಮ ಬೆಲೆ ಬೇಕು. ಅಂದರೆ ಇಂದಿನ ರೈತನಿಗೆ ಸಾಲಕ್ಕಿಂತ ಸಂಪೂರ್ಣ ಆರ್ಥಿಕ ಪರಿಸರ ಬೇಕಾಗಿದೆ, ಇದೇ PACSಗಳ ಮುಂದಿನ ದೊಡ್ಡ ಅವಕಾಶ.
‘ಸಾಲದ ಸಂಘ’ದಿಂದ ‘ರೈತರ ಆರ್ಥಿಕ ಕೇಂದ್ರ’ದತ್ತಮುಂದಿನ ಹಂತದಲ್ಲಿ ಪ್ರತಿ PACS ಒಂದು ಗ್ರಾಮೀಣ ಕೃಷಿ ಸೇವಾ ಕೇಂದ್ರವಾಗಬೇಕು.
ರೈತನಿಗೆ ಒಂದೇ ಸೂರಿನಡಿ ಸಾಲ, ಬೀಜ, ಗೊಬ್ಬರ, ಕೃಷಿ ಯಂತ್ರೋಪಕರಣ ಬಾಡಿಗೆ, ಗೋದಾಮು, ಶೀತಗೃಹ, ಕೃಷಿ ಉತ್ಪನ್ನಗಳ ಸಂಗ್ರಹಣೆ, ಮೌಲ್ಯವರ್ಧನೆ, ಮಾರುಕಟ್ಟೆ ಸಂಪರ್ಕ, ವಿಮೆ, ಡಿಜಿಟಲ್ ಸೇವೆ ಹಾಗೂ ಸರ್ಕಾರದ ಯೋಜನೆಗಳ ಮಾಹಿತಿ ದೊರೆಯಬೇಕು.
ಸ್ಥಳೀಯ ಪರಿಸ್ಥಿತಿಗೆ ಅನುಗುಣವಾಗಿ ಹೈನುಗಾರಿಕೆ, ಮೀನುಗಾರಿಕೆ, ಆಹಾರ ಸಂಸ್ಕರಣೆ, ಸೌರಶಕ್ತಿ, ಗ್ರಾಮೀಣ ಪ್ರವಾಸೋದ್ಯಮ, FPOಗಳೊಂದಿಗೆ ಸಹಭಾಗಿತ್ವ ಮುಂತಾದ ಹೊಸ ಕ್ಷೇತ್ರಗಳಿಗೂ PACS ಪ್ರವೇಶಿಸಬೇಕು.
ಮುಂದಿನ ದಶಕದ ಐದು ಆದ್ಯತೆಗಳು
ಮೊದಲನೆಯದು — ಸಂಪೂರ್ಣ ಡಿಜಿಟಲೀಕರಣ. ಪ್ರತಿಯೊಂದು PACSನ ಲೆಕ್ಕಪತ್ರ, ಸಾಲ, ಸದಸ್ಯತ್ವ ಮತ್ತು ಸೇವೆಗಳು ಪಾರದರ್ಶಕ ಡಿಜಿಟಲ್ ವ್ಯವಸ್ಥೆಯಲ್ಲಿರಬೇಕು.
ಎರಡನೆಯದು— ವೃತ್ತಿಪರ ನಿರ್ವಹಣೆ. ಸಹಕಾರಿ ಸಂಸ್ಥೆ ರಾಜಕೀಯ ವೇದಿಕೆಯಾಗದೆ ಆರ್ಥಿಕವಾಗಿ ಶಿಸ್ತಿನ, ವೃತ್ತಿಪರ ಸಂಸ್ಥೆಯಾಗಬೇಕು.
ಮೂರನೆಯದು— ಯುವಕರ ಪ್ರವೇಶ. ಯುವ ರೈತರು ಮತ್ತು ಮಹಿಳೆಯರನ್ನು ಸಹಕಾರದ ನಿರ್ಧಾರ ಪ್ರಕ್ರಿಯೆಯಲ್ಲಿ ಹೆಚ್ಚಿನ ಪ್ರಮಾಣದಲ್ಲಿ ಒಳಗೊಳ್ಳಬೇಕು.
ನಾಲ್ಕನೆಯದು— ಸಾಲದಾಚೆಗಿನ ಆದಾಯ. PACSಗಳ ಆದಾಯವು ಕೇವಲ ಸಾಲದ ಬಡ್ಡಿ ಮಾರ್ಜಿನ್ ಮೇಲೆ ಅವಲಂಬಿತವಾಗಿರಬಾರದು. ಗೋದಾಮು, ಕೃಷಿ ಸೇವೆ, ಸಂಸ್ಕರಣೆ, ಮಾರುಕಟ್ಟೆ ಮತ್ತು ಇತರ ಗ್ರಾಮೀಣ ಉದ್ಯಮಗಳಿಂದ ಸ್ವಂತ ಆದಾಯ ಸೃಷ್ಟಿಸಬೇಕು.
ಐದನೆಯದು— ಮೂರು ಹಂತಗಳ ಸಮನ್ವಯ. PACS–DCCB–Apex ನಡುವೆ ಕೇವಲ ಹಣಕಾಸಿನ ಸಂಬಂಧವಲ್ಲ, ತಂತ್ರಜ್ಞಾನ, ಮಾರುಕಟ್ಟೆ, ತರಬೇತಿ ಮತ್ತು ವ್ಯವಹಾರ ಅಭಿವೃದ್ಧಿಯ ಸಮಗ್ರ ಜಾಲ ನಿರ್ಮಾಣವಾಗಬೇಕು.
ರಾಜಕೀಯಕ್ಕಿಂತ ಸದಸ್ಯರ ಹಿತವೇ ಕೇಂದ್ರ.
ಸಹಕಾರಿ ಚಳವಳಿಯ ಬಲ ಅದರ ಸದಸ್ಯರಲ್ಲಿ. ಚುನಾವಣೆಗಳು ಸಹಕಾರದ ಒಂದು ಭಾಗ ಮಾತ್ರ; ಸಹಕಾರಿ ಸಂಸ್ಥೆಯ ಅಂತಿಮ ಗುರಿ ಸದಸ್ಯನ ಆರ್ಥಿಕ ಮತ್ತು ಸಾಮಾಜಿಕ ಪ್ರಗತಿ.
ಆದ್ದರಿಂದ ಆಡಳಿತ ಮಂಡಳಿಯಲ್ಲಿ ಪಾರದರ್ಶಕತೆ, ವೃತ್ತಿಪರತೆ, ಉತ್ತರದಾಯಿತ್ವ ಮತ್ತು ಉತ್ತಮ ಆಡಳಿತಕ್ಕೆ ಹೆಚ್ಚಿನ ಆದ್ಯತೆ ನೀಡಬೇಕು. ಸದಸ್ಯರ ಹಣವನ್ನು ನಿರ್ವಹಿಸುವ ಪ್ರತಿಯೊಂದು ಸಂಸ್ಥೆಯೂ ‘ನಮ್ಮ ಸಂಘ’ ಎಂಬ ಭಾವನೆಯಿಂದ ‘ನಮ್ಮ ಹೊಣೆಗಾರಿಕೆ’ ಎಂಬ ಸಂಸ್ಕೃತಿಗೆ ಸಾಗಬೇಕು.
ಕರ್ನಾಟಕಕ್ಕೆ ಸಿಗುತ್ತಿರುವ ಅಪೂರ್ವ ಅವಕಾಶ ಕಣಗಿನಹಾಳದಿಂದ ಆರಂಭವಾದ 122 ವರ್ಷಗಳ ಸಹಕಾರಿ ಪರಂಪರೆ ಕರ್ನಾಟಕದ ದೊಡ್ಡ ಶಕ್ತಿ. ಇಂದು ಕೇಂದ್ರದಲ್ಲಿ ಪ್ರತ್ಯೇಕ ಸಹಕಾರ ಸಚಿವಾಲಯವಿದೆ.
- ರಾಷ್ಟ್ರೀಯ ಸಹಕಾರಿ ನೀತಿ 2025 ಇದೆ . PACS ಗಣಕೀಕರಣದ ವೇಗ ಹೆಚ್ಚಾಗಿದೆ.
- ಬಹುಉದ್ದೇಶಿತ PACSಗಳಿಗೆ ಹೊಸ ಅವಕಾಶಗಳಿವೆ.
- DCCB ಮತ್ತು ರಾಜ್ಯ ಅಪೆಕ್ಸ್ ಬ್ಯಾಂಕ್ಗಳಿಗೆ ವಿಸ್ತರಣೆಯ ಅವಕಾಶಗಳೂ ಹೆಚ್ಚುತ್ತಿವೆ;
- RBIಯ ಇತ್ತೀಚಿನ ನಿರ್ದೇಶನಗಳ ಮೂಲಕ ಅರ್ಹ State Cooperative Banks ಮತ್ತು DCCBsಗಳಿಗೆ ಸ್ವಯಂಚಾಲಿತ ಮಾರ್ಗದಲ್ಲಿ ಹೊಸ ಶಾಖೆ ತೆರೆಯುವ ಅವಕಾಶವೂ ವಿಸ್ತರಿಸಲಾಗಿದೆ.
- ಹೀಗಾಗಿ ಮುಂದಿನ ಹತ್ತು ವರ್ಷಗಳು ಕರ್ನಾಟಕದ ಕೃಷಿ ಪತ್ತಿನ ಸಹಕಾರಕ್ಕೆ ನಿರ್ಣಾಯಕ.
- 1904ರಲ್ಲಿ ಆರಂಭವಾದ ಪತ್ತಿನ ಸಹಕಾರದ ಮೂಲ ಉದ್ದೇಶ ರೈತನನ್ನು ಶೋಷಣೆಯಿಂದ ರಕ್ಷಿಸುವುದಾಗಿದ್ದರೆ, 2026ರ ನಂತರದ ಸಹಕಾರದ ಗುರಿ ರೈತನನ್ನು ಆರ್ಥಿಕವಾಗಿ ಸಬಲೀಕರಿಸುವುದಾಗಬೇಕು.
- ಸಾಲ ನೀಡುವ ಸಂಸ್ಥೆಯಿಂದ ಸೇವೆ ನೀಡುವ ಸಂಸ್ಥೆಗೆ; ಸೇವಾ ಸಂಸ್ಥೆಯಿಂದ ವ್ಯವಹಾರ ಕೇಂದ್ರಕ್ಕ; ವ್ಯವಹಾರ ಕೇಂದ್ರದಿಂದ ರೈತರ ಸಮಗ್ರ ಆರ್ಥಿಕ ಪಾಲುದಾರನಿಗೆ _ಈ ಪರಿವರ್ತನೆಯೇ ಕರ್ನಾಟಕದ ಕೃಷಿ ಪತ್ತಿನ ಸಹಕಾರದ ಮುಂದಿನ ಹೆಜ್ಜೆಯಾಗಬೇಕು.
- 122 ವರ್ಷಗಳ ಪರಂಪರೆ ನಮ್ಮ ಹೆಮ್ಮೆ. ಆದರೆ ಮುಂದಿನ 25 ವರ್ಷಗಳ ಸಹಕಾರಿ ಪಯಣ ನಮ್ಮ ಹೊಣೆಗಾರಿಕೆ.
- ಗ್ರಾಮದ ರೈತನ ಕೈ ಬಲಪಡಿಸಿದಾಗ ಮಾತ್ರ ಸಹಕಾರ ಬಲಪಡುತ್ತದೆ; ಸಹಕಾರ ಬಲವಾದಾಗ ಮಾತ್ರ ಕರ್ನಾಟಕದ ಗ್ರಾಮೀಣ ಆರ್ಥಿಕತೆ ಬಲವಾಗುತ್ತದೆ.
ಸಾಣೂರು ನರಸಿಂಹ ಕಾಮತ್,
ರಾಜ್ಯ ಪ್ರಧಾನ ಕಾರ್ಯದರ್ಶಿ ಸಹಕಾರ ಭಾರತಿ ,ಕರ್ನಾಟಕ.
ನಿರ್ದೇಶಕರು,ಸಾಣೂರು ವ್ಯವಸಾಯ ಸೇವಾ ಸಹಕಾರಿ ಸಂಘ ನಿಯಮಿತ, ಸಾಣೂರು.