ಇಂದಿನ ಕಾಲದಲ್ಲಿ ಹಣವನ್ನು ಕೇವಲ ಉಳಿತಾಯ ಮಾಡಿದರೆ ಸಾಲದು, ಅದನ್ನು ಸರಿಯಾದ ಮಾರ್ಗದಲ್ಲಿ ಹೂಡಿ ಬೆಳೆಸುವುದು ಅಗತ್ಯ. ಷೇರು ಮಾರುಕಟ್ಟೆಯ ಬಗ್ಗೆ ಹೆಚ್ಚು ಜ್ಞಾನವಿಲ್ಲದವರಿಗೂ, ಸಮಯದ ಅಭಾವ ವಿರುವವರಿಗೂ ಸುಲಭವಾಗಿ ಹೂಡಿಕೆ ಮಾಡಲು ಅವಕಾಶ ನೀಡುವ ಸಾಧನವೇ ಮ್ಯೂಚುವಲ್ ಫಂಡ್. ಅನೇಕ ಹೂಡಿಕೆದಾರರಿಂದ ಹಣವನ್ನು ಸಂಗ್ರಹಿಸಿ, ತಜ್ಞರಾದ ಫಂಡ್ ಮ್ಯಾನೇಜರ್ ಅದನ್ನು ಷೇರುಗಳು, ಬಾಂಡ್‌ಗಳು ಮುಂತಾದ ವಿವಿಧ ಆಸ್ತಿಗಳಲ್ಲಿ ಹೂಡುತ್ತಾರೆ. ಇದರಿಂದ ಬರುವ ಲಾಭ ಅಥವಾ ನಷ್ಟವನ್ನು ಹೂಡಿಕೆದಾರರು ತಾವು ಹೂಡಿದ ಪ್ರಮಾಣಕ್ಕೆ ಅನುಗುಣವಾಗಿ ಹಂಚಿಕೊಳ್ಳುತ್ತಾರೆ. ಹೂಡಿಕೆದಾರರ ಗುರಿ, ಅವಧಿ ಮತ್ತು ಅಪಾಯ ಸಹಿಸುವ ಸಾಮರ್ಥ್ಯ ಬೇರೆ ಬೇರೆಯಾಗಿರುವುದರಿಂದ ಮ್ಯೂಚುವಲ್ ಫಂಡ್‌ಗಳಲ್ಲಿ ಹಲವು ವಿಧಗಳಿವೆ. ಅವುಗಳನ್ನು ಹೂಡಿಕೆಯ ಆಸ್ತಿ, ಫಂಡ್‌ನ ರಚನೆ, ನಿರ್ವಹಣಾ ಶೈಲಿ ಮತ್ತು ಅಪಾಯದ ಮಟ್ಟದ ಆಧಾರದ ಮೇಲೆ ವರ್ಗೀಕರಿಸಬಹುದು.
ಹೂಡಿಕೆಯ ಆಸ್ತಿಯ ಆಧಾರದ ವರ್ಗೀಕರಣ :- ಮ್ಯೂಚುವಲ್ ಫಂಡ್‌ಗಳಲ್ಲಿ ಅತ್ಯಂತ ಪ್ರಮುಖ ವರ್ಗೀಕರಣವೆಂದರೆ ಹಣವನ್ನು ಯಾವ ಆಸ್ತಿಯಲ್ಲಿ ಹೂಡಲಾಗುತ್ತದೆ ಎನ್ನುವುದು. ಇದರ ಪ್ರಕಾರ ಮೊದಲನೆಯದು ಈಕ್ವಿಟಿ ಫಂಡ್‌ಗಳು. ಇವು ತಮ್ಮ ಹೆಚ್ಚಿನ ಹಣವನ್ನು ಕಂಪನಿಗಳ ಷೇರುಗಳಲ್ಲಿ ಹೂಡುತ್ತವೆ. ದೀರ್ಘಾವಧಿಯಲ್ಲಿ ಹೆಚ್ಚಿನ ಲಾಭ ನೀಡುವ ಸಾಮರ್ಥ್ಯ ಇವುಗಳಿಗಿದೆ, ಆದರೆ ಮಾರುಕಟ್ಟೆಯ ಏರಿಳಿತಗಳಿಂದ ಅಪಾಯವೂ ಹೆಚ್ಚು. ಈಕ್ವಿಟಿ ಫಂಡ್‌ಗಳಲ್ಲಿ ಹಲವು ಉಪವಿಧಗಳಿವೆ. ಲಾರ್ಜ್ ಕ್ಯಾಪ್ ಫಂಡ್‌ಗಳು ದೊಡ್ಡ ಮತ್ತು ಸ್ಥಿರ ಕಂಪನಿಗಳಲ್ಲಿ ಹೂಡುವುದರಿಂದ ಅಪಾಯ ತುಲನಾತ್ಮಕವಾಗಿ ಕಡಿಮೆ. ಮಿಡ್ ಕ್ಯಾಪ್ ಫಂಡ್‌ಗಳು ಮಧ್ಯಮ ಗಾತ್ರದ ಕಂಪನಿಗಳಲ್ಲಿ ಹೂಡಿ ಮಧ್ಯಮ ಮಟ್ಟದ ಅಪಾಯ ಮತ್ತು ಬೆಳವಣಿಗೆ ನೀಡುತ್ತವೆ. ಸ್ಮಾಲ್ ಕ್ಯಾಪ್ ಫಂಡ್‌ಗಳು ಸಣ್ಣ ಕಂಪನಿಗಳಲ್ಲಿ ಹೂಡುವುದರಿಂದ ಹೆಚ್ಚಿನ ಲಾಭದ ಸಾಧ್ಯತೆಯ ಜೊತೆಗೆ ಹೆಚ್ಚಿನ ಅಪಾಯವೂ ಇರುತ್ತದೆ. ಮಲ್ಟಿ ಕ್ಯಾಪ್ ಮತ್ತು ಫ್ಲೆಕ್ಸಿ ಕ್ಯಾಪ್ ಫಂಡ್‌ಗಳು ಎಲ್ಲಾ ಗಾತ್ರದ ಕಂಪನಿಗಳಲ್ಲಿ ಹೂಡಿಕೆ ಮಾಡಿ ಹಂಚಿಕೆಯ ಸಮತೋಲನ ಕಾಪಾಡುತ್ತವೆ. ಸೆಕ್ಟೋರಲ್ ಮತ್ತು ಥೀಮ್ಯಾಟಿಕ್ ಫಂಡ್‌ಗಳು ಐಟಿ, ಬ್ಯಾಂಕಿಂಗ್, ಔಷಧ ಮುಂತಾದ ಒಂದೇ ವಲಯದ ಮೇಲೆ ಗಮನಹರಿಸುತ್ತವೆ. ಇನ್ನು ಈ ಎಲ್ ಎಸ್ ಎಸ್ ಎಂದು ಕರೆಯಲ್ಪಡುವ ತೆರಿಗೆ ಉಳಿತಾಯ ಫಂಡ್‌ಗಳಲ್ಲಿ ಮೂರು ವರ್ಷಗಳ ಲಾಕ್-ಇನ್ ಅವಧಿ ಇದ್ದು, ಹಳೆಯ ತೆರಿಗೆ ವ್ಯವಸ್ಥೆಯಲ್ಲಿ ಸೆಕ್ಷನ್ 80C ಅಡಿಯಲ್ಲಿ ತೆರಿಗೆ ವಿನಾಯಿತಿ ಸಿಗುತ್ತದೆ.
ಎರಡನೆಯದಾಗಿ, ಡೆಟ್ ಫಂಡ್‌ಗಳು ಸರ್ಕಾರಿ ಬಾಂಡ್‌ಗಳು, ಕಾರ್ಪೊರೇಟ್ ಬಾಂಡ್‌ಗಳು ಮತ್ತು ಟ್ರೆಜರಿ ಬಿಲ್‌ಗಳಂತಹ ಸಾಲಪತ್ರಗಳಲ್ಲಿ ಹೂಡುತ್ತವೆ. ಇವು ಸ್ಥಿರ ಆದಾಯವನ್ನು ಕಡಿಮೆ ಅಪಾಯದೊಂದಿಗೆ ನೀಡುತ್ತವೆ. ಲಿಕ್ವಿಡ್ ಫಂಡ್, ಶಾರ್ಟ್ ಡ್ಯುರೇಷನ್ ಫಂಡ್, ಗಿಲ್ಟ್ ಫಂಡ್ ಮತ್ತು ಕಾರ್ಪೊರೇಟ್ ಬಾಂಡ್ ಫಂಡ್‌ಗಳು ಇದಕ್ಕೆ ಉದಾಹರಣೆಗಳು. ಮೂರನೆಯದಾಗಿ, ಹೈಬ್ರಿಡ್ ಫಂಡ್‌ಗಳು ಈಕ್ವಿಟಿ ಮತ್ತು ಡೆಟ್ ಎರಡರಲ್ಲೂ ಹೂಡಿ ಲಾಭ ಮತ್ತು ಸುರಕ್ಷತೆಯ ನಡುವೆ ಸಮತೋಲನ ಸಾಧಿಸುತ್ತವೆ. ಅಗ್ರೆಸಿವ್ ಹೈಬ್ರಿಡ್, ಕನ್ಸರ್ವೇಟಿವ್ ಹೈಬ್ರಿಡ್, ಬ್ಯಾಲೆನ್ಸ್ಡ್ ಅಡ್ವಾಂಟೇಜ್ ಮತ್ತು ಆರ್ಬಿಟ್ರೇಜ್ ಫಂಡ್‌ಗಳು ಈ ವರ್ಗಕ್ಕೆ ಸೇರುತ್ತವೆ. ನಾಲ್ಕನೆಯದಾಗಿ, ಸಲ್ಯೂಷನ್ ಓರಿಯೆಂಟೆಡ್ ಫಂಡ್‌ಗಳನ್ನು ನಿವೃತ್ತಿ ಅಥವಾ ಮಕ್ಕಳ ಶಿಕ್ಷಣದಂತಹ ನಿರ್ದಿಷ್ಟ ಗುರಿಗಳಿಗಾಗಿ ರೂಪಿಸಲಾಗಿದ್ದು, ಸಾಮಾನ್ಯವಾಗಿ ಲಾಕ್-ಇನ್ ಅವಧಿ ಹೊಂದಿರುತ್ತವೆ.
ಫಂಡ್‌ನ ರಚನೆಯ ಆಧಾರದ ವರ್ಗೀಕರಣ:- ರಚನೆಯ ದೃಷ್ಟಿಯಿಂದ ಮ್ಯೂಚುವಲ್ ಫಂಡ್‌ಗಳು ಮೂರು ವಿಧ. ಓಪನ್-ಎಂಡೆಡ್ ಫಂಡ್‌ಗಳಲ್ಲಿ ಹೂಡಿಕೆದಾರರು ಯಾವುದೇ ಸಮಯದಲ್ಲಿ ಯೂನಿಟ್‌ಗಳನ್ನು ಅಂದಿನ ಎನ್ ಎ ವಿ ದರದಲ್ಲಿ ಖರೀದಿಸಬಹುದು ಅಥವಾ ಮಾರಬಹುದು; ಈ ನಮ್ಯತೆಯಿಂದಾಗಿ ಇವು ಅತ್ಯಂತ ಜನಪ್ರಿಯ. ಕ್ಲೋಸ್ಡ್-ಎಂಡೆಡ್ ಫಂಡ್‌ಗಳಿಗೆ ನಿಗದಿತ ಅವಧಿ ಇರುತ್ತದೆ; ಹೊಸ ಫಂಡ್ ಆಫರ್ ( ಎನ್ ಎಫ್ ಓ ) ಸಮಯದಲ್ಲಿ ಮಾತ್ರ ಹೂಡಿಕೆ ಸಾಧ್ಯವಿದ್ದು, ಅವಧಿ ಮುಗಿದ ನಂತರ ಹಣ ಹಿಂತಿರುಗುತ್ತದೆ. ಇಂಟರ್ವಲ್ ಫಂಡ್‌ಗಳಲ್ಲಿ ನಿರ್ದಿಷ್ಟ ಅವಧಿಗಳಲ್ಲಿ ಮಾತ್ರ ಖರೀದಿ ಮತ್ತು ಮಾರಾಟಕ್ಕೆ ಅವಕಾಶವಿರುತ್ತದೆ.
ನಿರ್ವಹಣಾ ಶೈಲಿಯ ಆಧಾರದ ವರ್ಗೀಕರಣ:- ನಿರ್ವಹಣೆಯ ದೃಷ್ಟಿಯಿಂದ ಆಕ್ಟಿವ್ ಮತ್ತು ಪ್ಯಾಸಿವ್ ಎಂಬ ಎರಡು ವಿಧಗಳಿವೆ. ಆಕ್ಟಿವ್ ಫಂಡ್‌ಗಳಲ್ಲಿ ಫಂಡ್ ಮ್ಯಾನೇಜರ್ ಸಂಶೋಧನೆ ನಡೆಸಿ ಷೇರುಗಳನ್ನು ಆಯ್ಕೆ ಮಾಡುತ್ತಾರೆ ಮತ್ತು ಮಾರುಕಟ್ಟೆಗಿಂತ ಹೆಚ್ಚಿನ ಲಾಭ ಗಳಿಸಲು ಪ್ರಯತ್ನಿಸುತ್ತಾರೆ; ಇದರಿಂದ ಖರ್ಚಿನ ಅನುಪಾತ ಹೆಚ್ಚಿರುತ್ತದೆ. ಪ್ಯಾಸಿವ್ ಫಂಡ್‌ಗಳಾದ ಇಂಡೆಕ್ಸ್ ಫಂಡ್ ಮತ್ತು ಇ ಟಿ ಎಫ್ ಗಳು ನಿಫ್ಟಿ ಅಥವಾ ಸೆನ್ಸೆಕ್ಸ್‌ನಂತಹ ಸೂಚ್ಯಂಕವನ್ನು ಯಥಾವತ್ತಾಗಿ ಅನುಸರಿ ಸುತ್ತವೆ, ಹೀಗಾಗಿ ಇವುಗಳ ನಿರ್ವಹಣಾ ವೆಚ್ಚ ಕಡಿಮೆ.
ಅಪಾಯದ ಮಟ್ಟದ ಆಧಾರದ ವರ್ಗೀಕರಣ:- ಅಪಾಯದ ದೃಷ್ಟಿಯಿಂದ ನೋಡಿದರೆ, ಲಿಕ್ವಿಡ್ ಮತ್ತು ಅಲ್ಟ್ರಾ ಶಾರ್ಟ್ ಡೆಟ್ ಫಂಡ್‌ಗಳು ಕಡಿಮೆ ಅಪಾಯದವು ಮತ್ತು ಸುರಕ್ಷತೆ ಬಯಸುವವರಿಗೆ ಸೂಕ್ತ. ಹೈಬ್ರಿಡ್ ಮತ್ತು ಲಾರ್ಜ್ ಕ್ಯಾಪ್ ಫಂಡ್‌ಗಳು ಮಧ್ಯಮ ಅಪಾಯದವು ಮತ್ತು ಸಮತೋಲನ ಬಯಸುವವರಿಗೆ ಹೊಂದುತ್ತವೆ. ಮಿಡ್ ಕ್ಯಾಪ್, ಸ್ಮಾಲ್ ಕ್ಯಾಪ್ ಮತ್ತು ಸೆಕ್ಟೋರಲ್ ಫಂಡ್‌ಗಳು ಹೆಚ್ಚಿನ ಅಪಾಯದವು; ದೀರ್ಘಾವಧಿಯಲ್ಲಿ ಹೂಡಿ ಏರಿಳಿತಗಳನ್ನು ಸಹಿಸಬಲ್ಲವರಿಗೆ ಇವು ಸೂಕ್ತ.
ಹೂಡಿಕೆಗೆ ಮುನ್ನ ಗಮನಿಸಬೇಕಾದ ಅಂಶಗಳು: -ಯಾವುದೇ ಫಂಡ್ ಆಯ್ಕೆ ಮಾಡುವ ಮೊದಲು ತನ್ನ ಹಣಕಾಸಿನ ಗುರಿ, ಹೂಡಿಕೆ ಅವಧಿ ಮತ್ತು ಅಪಾಯ ಸಹಿಷ್ಣುತೆಯನ್ನು ಅರಿತುಕೊಳ್ಳಬೇಕು. ಕ್ರಮಬದ್ಧ ಹೂಡಿಕೆ ಯೋಜನೆ ( ಎಸ್ ಐ ಪಿ ) ಮೂಲಕ ತಿಂಗಳಿಗೆ ಸಣ್ಣ ಮೊತ್ತವನ್ನೂ ಹೂಡಬಹುದು. ಜೊತೆಗೆ ಖರ್ಚಿನ ಅನುಪಾತ, ಎಕ್ಸಿಟ್ ಲೋಡ್ ಮತ್ತು ತೆರಿಗೆ ನಿಯಮಗಳನ್ನು ಪರಿಶೀಲಿಸುವುದು ಅಗತ್ಯ. ಹಿಂದಿನ ಲಾಭವು ಭವಿಷ್ಯದ ಲಾಭಕ್ಕೆ ಖಾತರಿಯಲ್ಲ ಮತ್ತು ಮ್ಯೂಚುವಲ್ ಫಂಡ್‌ಗಳು ಮಾರುಕಟ್ಟೆ ಅಪಾಯಕ್ಕೆ ಒಳಪಟ್ಟಿರುತ್ತವೆ ಎಂಬುದನ್ನು ಮರೆಯಬಾರದು.
ಒಟ್ಟಾರೆಯಾಗಿ, ಮ್ಯೂಚುವಲ್ ಫಂಡ್‌ಗಳು ಸಣ್ಣ ಮೊತ್ತದಿಂದ ಆರಂಭಿಸಿ ವೃತ್ತಿಪರ ನಿರ್ವಹಣೆ ಮತ್ತು ವೈವಿಧ್ಯಮಯ ಹೂಡಿಕೆಯ ಲಾಭ ಪಡೆಯಲು ಸಾಮಾನ್ಯ ಜನರಿಗೆ ಅವಕಾಶ ಮಾಡಿಕೊಡುತ್ತವೆ. ಈಕ್ವಿಟಿ, ಡೆಟ್, ಹೈಬ್ರಿಡ್ ಮುಂತಾದ ವಿವಿಧ ವಿಧಗಳು ವಿಭಿನ್ನ ಅಗತ್ಯ ಮತ್ತು ಅಪಾಯ ಸಾಮರ್ಥ್ಯದ ಜನರಿಗೆ ಸೂಕ್ತ ಆಯ್ಕೆಗಳನ್ನು ಒದಗಿಸುತ್ತವೆ. ಆದ್ದರಿಂದ ಹೂಡಿಕೆದಾರರು ತಮ್ಮ ಗುರಿಗೆ ತಕ್ಕ ಫಂಡ್ ಆಯ್ಕೆ ಮಾಡಿ, ಶಿಸ್ತುಬದ್ಧವಾಗಿ ಮತ್ತು ದೀರ್ಘಾವಧಿಗೆ ಹೂಡಿಕೆ ಮಾಡಿದರೆ ಸಂಪತ್ತು ಸೃಷ್ಟಿಯ ಹಾದಿ ಸುಗಮವಾಗುತ್ತದೆ.
ಇದು ಸಾಮಾನ್ಯ ಮಾಹಿತಿ ಮಾತ್ರ. ನಾನು ಹಣಕಾಸು ಸಲಹೆಗಾರನಲ್ಲ. ತೆರಿಗೆ ನಿಯಮಗಳು ಬದಲಾಗಬಹುದಾದ್ದರಿಂದ ಹೂಡಿಕೆ ನಿರ್ಧಾರಕ್ಕೆ ಮುನ್ನ ಸೆಬಿ ನೋಂದಾಯಿತ ಸಲಹೆಗಾರರನ್ನು ಸಂಪರ್ಕಿಸಿ.
ರಂಗನಾಥ ನೂಲಿಕರ